MT - Naħdmu Aktar għal Leġiżlazzjoni Aħjar

Lejn “korp ta’ azzjoni klimatika” għaż-żgħażagħ fl-Ewropa

Fri, 06 Dec 2024 13:00:00 +0100

Tnejn minn kull tliet żgħażagħ fl-Ewropa jixtiequ jikkontribwixxu għat-tranżizzjoni ekoloġika permezz tal-impjiegi tagħhom. Madankollu, 45% taż-żgħażagħ Ewropej m’għandhomx il-ħiliet ekoloġiċi biex jagħmlu dan. Iż-żgħażagħ għandhom ikunu mgħammra bil-ħiliet u l-għarfien rilevanti biex jaġixxu fuq l-isfidi ambjentali u tat-tibdil fil-klima. L-idea ta’ skema ta’ “bliet ekoloġiċi Erasmus” tkun li tipprovdi liż-żgħażagħ b’opportunitajiet ta’ volontarjat u traineeships imħallsa fi proġetti ekoloġiċi lokali.

Intemmu l-epidemija tal-HIV sal-2030

Fri, 29 Nov 2024 13:15:37 +0100

Mis-snin tmenin s’issa, l-HIV inbidel minn dijanjożi fatali għal kundizzjoni maniġġabbli, bis-saħħa ta’ avvanzi globali fit-trattament u fil-prevenzjoni. Ġew infettati aktar minn 88 miljun persuna madwar id-dinja, u s’issa mietu 42 miljun ruħ. Illum il-ġurnata, hemm madwar 40 miljun persuna li qed jgħixu bl-HIV, inkluż madwar 810,000 persuna fl-UE. Għalkemm is-sistemi tal-kura tas-saħħa huma organizzati fuq livell nazzjonali, l-UE tappoġġja programmi transfruntieri, tiffinanzja r-riċerka permezz ta’ Orizzont Ewropa, u ssostni kampanji favur is-saħħa pubblika. L-UE timpenja ruħha wkoll għall-għanijiet “95-95-95” tal-UNAIDS: sal-2025, 95% tal-persuni li qed jgħixu bl-HIV għandhom ikunu jafu l-istatus tagħhom, 95% ta’ dawk li jkunu jafu l-istatus tagħhom għandhom ikunu qed jirċievu trattament, u 95% tan-nies li jkunu qed jirċievu trattament għandhom ikunu laħqu s-soppressjoni virali. F’dan l-episodju ta’ “Naħdmu Aktar għal Leġiżlazzjoni Aħjar”, se nesploraw ir-rwol vitali tal-UE fil-prevenzjoni tal-HIV, il-ġlieda tagħha kontra l-istigma, u t-titjib tal-ħajjiet fil-pajjiżi tal-UE. L-għan hu li l-futur ikun ħieles mill-HIV sal-2030.

Il-Qafas Finanzjarju Pluriennali

Fri, 22 Nov 2024 17:00:00 +0100

Il-qafas finanzjarju pluriennali essenzjalment huwa l-pjan baġitarju fit-tul tal-Unjoni Ewropea. Huwa jistabbilixxi l-prijoritajiet u l-limiti tal-infiq għall-UE għal diversi snin, filwaqt li jiżgura li r-riżorsi finanzjarji tal-Unjoni Ewropea jkunu jikkonformaw mal-għanijiet politiċi u ekonomiċi tagħha. Il-qafas finanzjarju pluriennali jistabbilixxi l-istruttura għall-baġits annwali u jgħin biex jinstab bilanċ bejn l-interessi differenti tal-pajjiżi tal-Unjoni Ewropea.

Dan il-qafas jalloka riżorsi finanzjarji f’varjetà ta’ oqsma, inkluż finanzjament għal reġjuni inqas żviluppati, sussidji u żvilupp rurali, għajnuna umanitarja u investimenti fit-tranżizzjoni ekoloġika u dik diġitali, kif ukoll investimenti fil-politika barranija tal-Unjoni Ewropea.

Approċċ komprensiv għas-saħħa mentali

Fri, 15 Nov 2024 13:00:00 +0100

Is-saħħa mentali u l-benesseri huma kruċjali biex kulħadd jgħix ħajja sodisfaċenti, jilħaq il-potenzjal sħiħ tiegħu, jikkontribwixxi b’mod attiv għall-komunitajiet tiegħu u jkampaw mal-istress u l-isfidi tal-ħajja. L-UE taħdem ħafna biex tiżgura li ħadd ma jiġi eskluż u li n-nies ikollhom aċċess ugwali għall-prevenzjoni u għas-servizzi tas-saħħa mentali fil-pajjiżi kollha tal-UE. Madankollu, għad fadal ħafna xi jsir biex ngħinu lil kulħadd jikseb l-aħjar standard possibbli ta’ saħħa mentali u benesseri.

Lejn strateġija Ewropea għall-anzjani

Fri, 08 Nov 2024 13:00:00 +0100

L-Ewropa qed tesperjenza bidla demografika bħal qatt qabel. Sal-2050, kważi terz tal-popolazzjoni tal-UE se jkollha 65 sena jew aktar. Il-popolazzjoni li qed tixjieħ tal-UE se jkollha implikazzjonijiet profondi f’diversi oqsma, inklużi l-kura tas-saħħa, is-servizzi soċjali, is-suq tax-xogħol u l-ekonomija. Il-politiki tal-UE għall-anzjani jiffukaw fuq diversi oqsma ewlenin: it-tixjiħ attiv, l-inklużjoni soċjali, il-kura tas-saħħa u l-kura fit-tul, u s-sigurtà finanzjarja. L-UE issa teħtieġ strateġija komprensiva għall-anzjani.

L-Unjoni Ewropea, kif issawwar it-turiżmu madwar l-Ewropa?

Fri, 25 Oct 2024 13:00:00 +0200

It-turiżmu huwa wieħed mill-aktar industriji vibranti fl-UE: ilaqqa’ lin-nies flimkien, jippromwovi l-fehim kulturali u jrawwem it-tkabbir ekonomiku. L-UE kif tappoġġja u ssaħħaħ it-turiżmu, u kif tiżgura li l-ivvjaġġar ikun aktar sostenibbli, aċċessibbli u ta’ benefiċċju għal kulħadd?

Orizzont Ewropa: Fuq quddiem fl-innovazzjoni permezz tar-riċerka tal-Unjoni Ewropea

Tue, 01 Oct 2024 17:30:00 +0200

Orizzont Ewropa huwa l-akbar programm ta’ riċerka u innovazzjoni tal-Unjoni Ewropea, b’baġit ta’ EUR 95.5 biljun għall-perjodu ta’ bejn l-2021 u l-2027. Dan huwa aktar minn sempliċement programm ta’ finanzjament: huwa jirrappreżenta l-impenn tal-Unjoni Ewropea biex tixpruna l-eċċellenza xjentifika, trawwem l-innovazzjoni u tindirizza l-isfidi tas-soċjetà fil-pajjiżi kollha tal-Unjoni Ewropea. Dan il-programm ambizzjuż jappoġġja lir-riċerkaturi, lin-negozji u lil dawk li jfasslu l-politika waqt li jippromwovi l-Ewropa bħala mexxejja globali fir-riċerka u l-innovazzjoni.

Ir-rwol tad-delegazzjonijiet tal-Parlament Ewropew

Wed, 25 Sep 2024 17:30:00 +0200

Id-delegazzjonijiet tal-Parlament Ewropew huma gruppi uffiċjali ta’ Membri tal-PE li għandhom l-għan li jiżviluppaw relazzjonijiet mal-parlamenti ta’ pajjiżi terzi kif ukoll ma’ reġjuni jew organizzazzjonijiet terzi. Dawn id-delegazzjonijiet iżommu l-kuntatti internazzjonali tal-Parlament, jiżviluppawhom u jikkontribwixxu għat-tisħiħ tar-rwol tal-Unjoni Ewropea u l-viżibbiltà tagħha madwar id-dinja.

X’inhi s-Sistema Ewropea għall-Akkumulazzjoni u t-Trasferiment ta’ Krediti, jew inkella ECTS?

Fri, 30 Aug 2024 13:00:00 +0200

Is-Sistema Ewropea għall-Akkumulazzjoni u t-Trasferiment ta’ Krediti (jew ECTS) hija għodda taż-Żona Ewropea ta’ Edukazzjoni Għolja biex l-istudji u l-korsijiet ikunu aktar trasparenti. L-ECTS tagħmilha aktar faċli biex il-kwalifiki jiġu rikonoxxuti madwar l-Ewropa u tgħin lill-istudenti jiċċaqilqu minn pajjiż għal ieħor.

Għal ilma aktar nadif: l-istrateġija tal-Unjoni Ewropea biex tiġi restawrata l-kwalità tal-ilma

Mon, 05 Aug 2024 17:30:00 +0200

L-ilma huwa essenzjali għall-ħajja. Isostni l-ekosistemi tagħna u l-agrikoltura, u huwa vitali għall-bnedmin, biex nissodisfaw l-aktar ħtiġijiet bażiċi tagħna. It-tniġġis tal-ilma għadu sfida sinifikanti madwar id-dinja. Kontaminanti bħall-iskart industrijali, l-iskol agrikolu u t-tniġġis mill-plastik qed jiddegradaw il-korpi tal-ilma tagħna. Dan qed iwassal għal kwistjonijiet ekoloġiċi u tas-saħħa severi. Isma’ dan il-podcast biex tifhem għaliex il-kampanja #WaterWiseEU hija essenzjali għall-futur tal-pjaneta tagħna u x’qed tagħmel l-Unjoni Ewropea biex tindirizza din il-kwistjoni.

Nipproteġu l-oċean, wasal iż-żmien li nieħdu azzjoni

Mon, 29 Jul 2024 17:00:00 +0200

Aħna lkoll niddependu mill-oċean biex ngħixu. Madankollu, ħafna minna ma napprezzawhx u spiss ninsew li dan jipprovdilna l-ikel li nieklu u jiġġenera ħafna mill-ossiġnu li nieħdu.

S’issa, il-biċċa l-kbira tal-oċean għadu ma ġiex regolat u l-bijodiversità tal-baħar tiegħu għadha ma ġietx protetta. Dan wassal għal prattiki mhux sostenibbli, sajd illegali, tniġġis, u t-telf ta’ ħabitats tal-baħar.

L-għan tal-Unjoni Ewropea hu li ssaħħaħ l-isforzi kollettivi biex tindirizza dawn il-kwistjonijiet.

Ir-rifuġjati u l-kriżijiet umanitarji

Fri, 05 Jul 2024 12:00:00 +0200

Fl-aħħar ta’ April 2024, madwar id-dinja kien hemm aktar minn 120 miljun persuna spostati b’mod furzat bħala riżultat ta’ persekuzzjoni, kunflitt, vjolenza u ksur tad-drittijiet tal-bniedem. Dan huwa ekwivalenti għal aktar minn persuna waħda minn kull 69 persuna. Fosthom hemm aktar minn 43 miljun rifuġjat. Hemm ukoll miljuni ta’ persuni apolidi li ġew imċaħħda milli jkollhom nazzjonalità. Il-kriżi tar-rifuġjati hija waħda mill-akbar sfidi li qiegħda tipprova tindirizza l-Unjoni Ewropea.

Nisfruttaw il-potenzjal sħiħ tal-SMEs Ewropej

Fri, 28 Jun 2024 12:00:00 +0200

L-intrapriżi żgħar u ta’ daqs medju, bħall-furnara, il-parrukkiera, tal-fjuri u l-ħwienet tal-kotba huma s-sinsla tal-ekonomija tal-Unjoni Ewropea. Dawn jirrappreżentaw 99% tan-negozji kollha fl-Unjoni Ewropea u jammontaw għal aktar minn nofs il-prodott domestiku gross tagħna. Madankollu, l-SMEs spiss jiffaċċjaw firxa ta’ sfidi li jpoġġu f’riskju s-sopravivenza tagħhom fis-suq.

Is-sikurezza tal-ikel fl-Unjoni Ewropea

Mon, 10 Jun 2024 18:00:00 +0200

Is-sikurezza tal-ikel għandha l-għan li tiżgura livell għoli ta’ protezzjoni għas-saħħa u l-ħajja tal-bniedem. Din tkopri diversi aspetti, bħall-iġjene tal-ikel, it-tikkettar, l-imballaġġ u t-traċċabbiltà tal-prodotti. Kull sena, 600 miljun persuna fid-dinja jimirdu b’200 tip differenti ta’ mard li jista’ jiġi trażmess mill-ikel.

L-Unjoni Ewropea tipprova tipprevjeni dan il-mard billi tagħmel mill-aħjar li tista’ biex ikollha wħud mill-ogħla standards ta’ sikurezza tal-ikel fid-dinja.

Il-Jum Dinji tal-Ambjent 2024

Fri, 07 Jun 2024 12:00:00 +0200

Il-Jum Dinji tal-Ambjent jiġi ċċelebrat kull sena fil-5 ta’ Ġunju. Matul l-aħħar 50 sena, dan il-jum sar wieħed mill-akbar pjattaformi globali għas-sensibilizzazzjoni ambjentali. Kull sena, għexieren ta’ miljuni ta’ nies flimkien ma’ gvernijiet, kumpaniji, bliet u organizzazzjonijiet komunitarji jinvolvu ruħhom f’din l-inizjattiva. Fl-2024, l-Arabja Sawdija qed tospita ċ-ċelebrazzjonijiet b’enfasi fuq ir-restawr tal-art, id-deżertifikazzjoni u r-reżiljenza għan-nixfa bħala parti mill-kampanja #GenerationRestoration.

Niġġieldu d-diskriminazzjoni kontra l-persuni LGBTIQ

Fri, 31 May 2024 12:00:00 +0200

Kull persuna għandha tħossha ħielsa li tkun hi nnifisha u tħobb lil min tixtieq mingħajr ebda biża’.

Madankollu, il-persuni leżbjani, gay, bisesswali, trans, intersesswali u queer għadhom jiffaċċjaw diskriminazzjoni f’bosta partijiet tad-dinja, inkluż l-Ewropa.

L-Unjoni Ewropea hija impenjata bis-sħiħ fil-ġlieda kontra d-diskriminazzjoni. Skopri aktar dwar kif l-Unjoni Ewropea qed tipprova tiżviluppa soċjetà aktar inklużiva fejn kulħadd jista’ jħossu sikur billi tisma’ dan il-podcast.

Nipproteġu lid-dakkara

Fri, 24 May 2024 12:00:00 +0200

L-insetti li jdakkru għandhom rwol fundamentali fl-ekosistema tagħna, iżda dawn qed jiltaqgħu ma’ bosta theddid madwar id-dinja kollha, fosthom: it-tibdil fil-klima, it-telf tal-ħabitats, il-pesti u l-biedja intensiva msejsa fuq prodott wieħed biss. Minkejja r-rwol vitali tagħhom fil-benesseri u n-natura tagħna, dan it-theddid qed jikkawża tnaqqis drammatiku kemm fl-ispeċijiet ta’ dakkara selvaġġi kif ukoll f’dawk ġestiti. L-Unjoni Ewropea qed taħdem biex tipproteġi lid-dakkara kollha.

Id-disa’ leġiżlatura tal-Parlament Ewropew

Fri, 17 May 2024 12:00:00 +0200

Il-pandemija globali tal-COVID-19 u l-gwerra tar-Russja kontra l-Ukrajna kellhom impatt sinifikanti fuq l-aġenda tal-Parlament Ewropew matul id-disa’ leġiżlatura tiegħu. Bħala konsegwenza ta’ kriżi tas-saħħa u ta’ diversi sfidi ġeopolitiċi, matul id-disa’ leġiżlatura tiegħu, il-Parlament iffoka fuq it-tranżizzjoni ekoloġika u dik diġitali biex tissaħħaħ ir-reżiljenza tal-Unjoni Ewropea filwaqt li jissaħħu wkoll il-valuri demokratiċi.

L-istrateġija tal-Unjoni Ewropea għall-foresti għall-2030

Thu, 21 Mar 2024 18:25:23 +0100

L-UE hija waħda mir-reġjuni l-aktar għonja fil-foresti fid-dinja: madwar 40% tal-art tagħha hija miksija b’foresti. Il-foresti huma essenzjali għas-saħħa u l-benesseri tagħna, kif ukoll għas-saħħa tal-pjaneta. Huma rikki fil-bijodiversità u huma importanti ħafna fil-ġlieda kontra t-tibdil fil-klima. L-UE hija konxja tar-rwol li l-foresti jista’ jkollhom fil-futur tagħna. Għalhekk, fl-2021 l-UE adottat l-Istrateġija l-ġdida għall-Foresti għall-2030.

Il-ġlieda tal-Unjoni Ewropea għad-drittijiet tan-nisa

Thu, 07 Mar 2024 18:00:00 +0100

Il-Jum Internazzjonali tan-Nisa jiġi ċċelebrat kull sena fit-8 ta’ Marzu biex jirrikonoxxi l-kisbiet tan-nisa u tixħet l-attenzjoni fuq id-drittijiet tan-nisa. Hija okkażjoni biex titqajjem kuxjenza dwar kwistjonijiet bħall-ugwaljanza bejn il-ġeneri, id-drittijiet riproduttivi u l-ġlieda kontra l-vjolenza u l-abbuż fil-konfront tan-nisa. L-ugwaljanza bejn in-nisa u l-irġiel minn dejjem kienet waħda mill-valuri u l-objettivi ewlenin tal-Unjoni Ewropea, iżda dan l-għan għadu ma ntlaħaqx kompletament.

Il-Kard Ewropea tad-Diżabilità

Mon, 04 Mar 2024 17:00:00 +0100

Il-Kard Ewropea tad-Diżabilità u l-Kard Ewropea għall-Parkeġġ huma inizjattivi li għandhom l-għan li jindirizzaw l-ostakli li jiltaqgħu magħhom il-persuni b’diżabilità waqt li jkunu qed jivvjaġġaw f’pajjiżi tal-Unjoni Ewropea li huma differenti mill-pajjiż li joriġinaw minnu. Dawn il-kards huma mfassla biex jipprovdu lid-detenturi bi prova rikonoxxuta tal-istatus ta’ diżabilità tagħhom. Barra minn hekk, huma jissimplifikaw l-aċċess għas-servizzi, jippromwovu l-moviment liberu u jappoġġjaw id-drittijiet ugwali fi ħdan l-Unjoni Ewropea.

Il-gwerra tar-Russja kontra l-Ukrajna

Sat, 24 Feb 2024 08:00:00 +0100

Minn mindu r-Russja nediet invażjoni illegali fuq skala sħiħa tal-Ukrajna fi Frar 2022, l-Unjoni Ewropea appoġġjat lil Kiev billi kkundannat l-aggressjoni min-naħa tar-Russja, issanzjonat lil dawk responsabbli u pprovdiet appoġġ finanzjarju u materjali.

Tolleranza żero għall-mutilazzjoni ġenitali femminili

Fri, 09 Feb 2024 17:00:00 +0100

Il-mutilazzjoni ġenitali femminili tinkludi l-proċeduri kollha li, intenzjonalment, ibiddlu jew jikkawżaw ħsara lill-organi ġenitali tan-nisa għal raġunijiet mhux mediċi. Din issir għal raġunijiet kulturali, reliġjużi u xi kultant soċjali, iżda ma għandha l-ebda benefiċċju għas-saħħa u jista’ jkollha effetti serji immedjati u fit-tul fuq is-saħħa u l-benesseri. X’qed isir biex din il-prattika tiġi fi tmiemha?

Il-Pjan tal-Ewropa biex Jingħeleb il-Kanċer

Fri, 02 Feb 2024 12:00:00 +0100

Wara l-mard kardjovaskulari, il-kanċer huwa t-tieni kawża ewlenija ta’ mewt fil-pajjiżi tal-Unjoni Ewropea. Kull sena, kważi 3 miljun persuna jiġu ddijanjostikati bil-marda, u 1.2 miljun jitilfu ħajjithom minħabba fiha. Għalkemm ir-responsabbiltà għall-politiki tas-saħħa taqa’ primarjament f’idejn il-pajjiżi tal-Unjoni Ewropea, il-ġlieda kontra l-kanċer hija waħda mill-prijoritajiet tal-Unjoni Ewropea.

It-tkabbir tal-Unjoni Ewropea: kif jaħdem

Mon, 29 Jan 2024 17:00:00 +0100

L-Unjoni Ewropea hija unjoni politika u ekonomika b’27 Stat Membru, imma għadd ta’ pajjiżi oħra applikaw biex jissieħbu fl-Unjoni. Bħalissa hemm disa’ pajjiżi kandidati. Madankollu, il-proċess biex pajjiż isir stat membru huwa twil u mhuwiex daqshekk sempliċi.

L-avvanz fl-edukazzjoni: nesploraw inizjattivi tal-Unjoni Ewropea għall-mobbiltà għat-tagħlim

Wed, 24 Jan 2024 12:00:00 +0100

L-Unjoni Ewropea tinsab impenjata li tibqa’ ttejjeb l-opportunitajiet tat-tagħlim u tindirizza l-isfidi edukattivi. F’dan il-kuntest, l-inizjattiva taż-Żona Ewropea tal-Edukazzjoni għandha l-għan li toħloq sistema edukattiva aktar interkonnessa. L-iskopijiet primarji taż-Żona Ewropea tal-Edukazzjoni jinkludu t-tisħiħ tal-kooperazzjoni, il-mobbiltà fl-edukazzjoni u l-bini ta’ sistemi edukattivi inklużivi. Wieħed mill-punti fokali ewlenin huwa li jitneħħew l-ostakli tal-mobbiltà għat-tagħlim għall-istudenti u l-edukaturi.

L-impatt ambjentali tal-gwerra tar-Russja fuq l-Ukrajna

Tue, 16 Jan 2024 12:00:00 +0100

Minn meta faqqgħu l-ostilitajiet tal-2014 u speċjalment minn mindu r-Russja bdiet l-invażjoni fuq skala sħiħa tagħha tal-Ukrajna fl-24 ta’ Frar 2022, il-kunflitt mhux biss wassal għal eluf ta’ vittmi, kriżi tar-refuġjati u xokk ekonomiku, iżda għamel ukoll ħsara kbira lill-ambjent.

Il-Pjattaforma tat-Teknoloġiji Strateġiċi għall-Ewropa (STEP)

Fri, 12 Jan 2024 12:12:01 +0100

Fit-tellieqa għad-dominanza teknoloġika globali, fl-2020 l-UE nediet strateġija biex issaħħaħ l-industrija tagħha. Dan wassal għall-proposta għal Pjattaforma tat-Teknoloġiji Strateġiċi għall-Ewropa (STEP), intiża li tindirizza l-ħtiġijiet ta’ investiment sostanzjali. L-iSTEP se tuża l-fondi eżistenti tal-UE bl-aħjar mod possibbli biex l-UE ssir aktar innovattiva, sostenibbli u awtosuffiċjenti. Hija prekursur ta’ Fond Ewropew għas-Sovranità, stabbilit biex il-kapaċitajiet industrijali jkomplu jissaħħu.

Kif l-Unjoni Ewropea tappoġġja l-kultura

Wed, 10 Jan 2024 12:00:00 +0100

Il-Parlament Ewropew jgħin lis-setturi kulturali u awdjoviżivi permezz tal-programm Ewropa Kreattiva. B’baġit ta’ EUR 2.5 biljun għall perjodu ta’ bejn l-2021 u l-2027, l-Unjoni Ewropea tinvesti f’setturi diversi bħall-mużika lajv, il-kotba, l-arkitettura, iċ-ċinema u l-mezzi tax-xandir tal-aħbarijiet. Il-programm jikkontribwixxi wkoll fil-ġlieda kontra d-differenza bejn il-ġeneri fl-industriji kulturali u jippromwovi l-valuri u l-patrimonju Ewropej. Huwa jinqasam fi tliet fergħat: il-fergħa tal-Kultura, dik tal-Media u dik Transettorjali, sabiex jindirizza aħjar il-varjazzjonijiet ta’ kull settur.

Lejn regoli ġodda għall-Unjoni Ewropea kollha biex nindirizzaw l-ammont dejjem jikber ta’ skart mill-imballaġġ

Fri, 15 Dec 2023 12:00:00 +0100

Minn ekonomiji ċirkolari għal miri ta’ riċiklaġġ. F’dan l-episodju se nitkellmu dwar id-Direttiva tal-Unjoni Ewropea dwar l-Imballaġġ u l-Iskart mill-Imballaġġ. Se nitkellmu wkoll fuq il-pożizzjoni tal-Parlament dwar regoli ġodda għall-Unjoni Ewropea kollha biex nindirizzaw l-ammont dejjem jikber ta’ skart. Ir-regoli l-ġodda huma mfassla biex jiffaċilitaw l-użu mill-ġdid u r-riċiklaġġ tal-imballaġġ, inaqqsu l-imballaġġ bla bżonn u l-iskart li jirriżulta minnu. Barra minn hekk, huma jippromwovu l-użu ta’ kontenut riċiklat fl-imballaġġ.

L-Att tal-Unjoni Ewropea dwar il-Libertà tal-Media

Fri, 08 Dec 2023 12:00:00 +0100

B’rispons għat-theddid dejjem jikber għal-libertà tal-media u l-vijabbiltà finanzjarja tal-istabbilimenti tal-media, il-Parlament adotta qafas komuni għas-servizzi tal-media, magħruf bħala l-Att Ewropew dwar il-Libertà tal-Media. Dan hu tassew pass importanti, peress li l-att jipproteġi lill-ġurnalisti u lil min jaħdem fil-media, iħeġġeġ it-trasparenza fis-sjieda tal-media u jippromwovi l-kooperazzjoni internazzjonali biex jiġi żgurat ambjent medjatiku varjat u indipendenti.

L-użi differenti tad-droni fil-kamp mediku

Wed, 06 Dec 2023 12:00:00 +0100

F'dan l-episodju ta' "Naħdmu Aktar għal Leġiżlazzjoni Aħjar" se nitkellmu dwar l-użi li jsiru mid-droni fil-kamp mediku u l-miżuri li l-Unjoni Ewropea qiegħda tieħu biex tirregolahom.

L-inizjattiva taċ-Ċittadini Ewropej: “Fur free Europe - Ewropa Ħielsa mill-Pil tal-Annimali”

Mon, 04 Dec 2023 17:00:00 +0100

F’dawn l-aħħar snin, il-produzzjoni tal-pil qiegħda tonqos. Dan huwa bis-saħħa tal-fatt li qed tiżdied is-sensibilizzazzjoni dwar il-benessri tal-annimali, it-tħassib dwar l-impatt ambjentali li tħalli din il-produzzjoni u r-riskji għas-saħħa pubblika relatati. L-inizjattiva taċ-Ċittadini “Ewropa Ħielsa mill-Pil tal-Annimali” għandha l-għan li tipprojbixxi t-trobbija ta’ annimali għall-pil u l-bejgħ ta’ prodotti magħmula mill-pil madwar l-Unjoni Ewropea. L-organizzaturi tal-inizjattiva ġabru aktar minn miljun u nofs firma biex jappoġġjaw it-talbiet tagħhom u juru kif iċ-ċittadini tal-Unjoni Ewropea jistgħu jkunu involuti b’mod attiv fit-tfassil tal-politika tal-Unjoni Ewropea.