Éist leis seo!

Duais Daphne Caruana Galizia don Iriseoireacht 2025

Thu, 30 Oct 2025 09:00:00 +0100

Tá Duais Daphne Caruana Galizia don Iriseoireacht 2025 buaite ag ‘Follow the Money’, ardán Ollannach a dhéanann iriseoireacht iniúchach. Rinne an t-imscrúdú, faoi stiúir an ardáin, agus i gcomhar le 13 sheomra nuachta ón mBeilg, ón Danmhairg, ón nGearmáin, ón nGréig, ón Iodáil, ón Iorua, agus ón Ríocht Aontaithe, léiriú ar an tslí ar thuill longúinéirí an Iarthair os cionn 6 bhilliún dollar as 230 tancaer atá ag dul in aois a dhíol le scáthfhlít na Rúise.

Déanann an gradam prionsabail agus luachanna an Aontais atá cumhdaithe i gCairt um Chearta Bunúsacha an Aontais Eorpaigh a chur chun cinn. Ainmníodh é in onóir Daphne Caruana Galizia, iriseoir agus blagálaí as Málta, a bhíodh ag gníomhú i gcoinne na caimiléireachta agus a feallmharaíodh in 2017.

Duais Sakharov um Shaoirse Smaointeoireachta 2025

Thu, 23 Oct 2025 12:00:00 +0200

Is iad na hiriseoirí Andrzej Poczobut ón mBealarúis agus Mzia Amaglobeli ón tSeoirsia atá i bpríosún buaiteoirí Dhuais Sakharov um Shaoirse Smaointeoireachta de Pharlaimint na hEorpa 2025.

Cuireadh Duais Sakharov um Shaoirse Smaointeoireachta ar bun in 1988 chun ómós a léiriú do dhaoine aonair agus d’eagraíochtaí a chosnaíonn cearta an duine agus saoirsí bunúsacha.

LUX - Gradam Scannánaíochta Lucht Féachana na hEorpa 2026

Tue, 07 Oct 2025 23:00:00 +0200

Is iad seo na cúig scannán a bheidh san iomaíocht do Ghradam Lucht Féachana LUX 2026: Christy, Deaf, It Was Just an Accident, Love Me Tender agus Sentimental Value.

Is é atá i gceist le ‘Gradam LUX ná aird a tharraingt ar scannáin a dhéileálann le téamaí sóisialta agus polaitiúla. Tá sé mar aidhm leis plé agus machnamh a spreagadh agus scannáin a úsáid chun féiniúlacht Eorpach níos láidre a chothú.

Teangacha comharthaíochta: ag cur le tírdhreach ilteangach an Aontais

Fri, 19 Sep 2025 12:00:00 +0200

Aithnítear 29 dteanga chomharthaíochta náisiúnta ar fud an Aontais faoi láthair. Ní hamháin go n-úsáideann daoine bodhra agus breacbhodhra iad, ach úsáideann daoine le héisteacht iad chomh maith chun cumarsáid a dhéanamh le gaolta agus cairde. Chun feasacht a mhúscailt faoin éagsúlacht teanga agus chultúrtha sin, d’fhógair na Náisiúin Aontaithe an 23 Meán Fómhair mar Lá Idirnáisiúnta na dTeangacha Comharthaíochta. San eagrán seo, féachfaimid ar theangacha comharthaíochta san Aontas agus ar a bhfuil á dhéanamh ag Parlaimint na hEorpa chun iad a chaomhnú agus a chur chun cinn.

Conas atá an tAontas ag troid i gcoinne truailliú plaisteach: ó thoirmisc aonúsáide go micreaphlaistigh

Fri, 06 Jun 2025 13:00:00 +0200

D’ainneoin breis eolais agus iarrachtaí ar athchúrsáil, ní athchúrsáiltear go leor dramhaíola plaisteach san Aontas fós. Le blianta anuas, tá an tAontas ag lorg geilleagar ciorclach le haghaidh plaistigh. Ach is turas fada é agus ní mór dúinn go léir ár gcion féin a dhéanamh.

Rialacha nua an Aontais do cheadúnais tiomána

Fri, 22 Aug 2025 12:00:00 +0200

Tá na rialacha do cheadúnais tiomána tugtha suas chun dáta ag an Aontas Eorpach ar mhaithe le sábháilteacht ar bhóithre a fheabhsú agus an tsoghluaisteacht a nuachóiriú. Is iad seo a leanas na príomh-athruithe: ceadúnas tiomána digiteach a bheidh bailí ar fud na mBallstát, coinníollacha níos déine do thiománaithe nuacheadúnaithe agus seiceálacha oiriúnachta leighis comhchuibhithe. Trí fhorfheidhmiú a dhéanamh ar thoirmisc thiomána ar bhonn trasteorann, cinnteofar go ngearrfar pionós as cionta tromchúiseacha ar fud an Aontais. Tacaíonn na hathchóirithe seo le sprioc ‘Fís Nialais’: deireadh a chur le bás agus gortuithe tromchúiseacha ar na bóithre faoi 2050.

Bacainn an Bhéarlagair a Bhaint: Bainc an Aontais Eorpaigh

Fri, 18 Jul 2025 12:00:00 +0200

Ar chuala tú riamh trácht ar an mBanc Ceannais Eorpach agus an Banc Eorpach Infheistíochta? An bhfuil cur amach agat ar mhisin na n-institiúidí sin? Cad faoi na cosúlachtaí agus na héagsúlachtaí eatarthu? Sa phodchraoladh seo, caithfimid súil ar dhá phríomh-institiúid airgeadais an Aontais agus féachfaimid ar na spriocanna atá acu araon agus ar na gnéithe éagsúla a bhaineann leo.

Konrad Adenauer, comhartha na haontachta agus na síochána

Thu, 08 May 2025 17:30:00 +0200

Bhí ról lárnach ag Konrad Adenauer, an chéad seansailéir a bhí ag Poblacht Chónaidhme na Gearmáine, in atógáil na tíre tar éis an dara cogadh domhanda agus i gcothú na haontachta Eorpaí. Thug sé tús áite don athmhuintearas leis an bhFrainc agus thacaigh sé le lánpháirtiú Eorpach trí thionscnaimh amhail an Comhphobal Eorpach do Ghual agus Cruach. D’ainneoin saincheisteanna amhail Balla Bheirlín, lean sé de dhua a chaitheamh leis an tsíocháin agus an aontacht a chur chun cinn san Eoraip.